ЛІТЕРАТУРНЫЙ КОНКУРЗ МАРІЇ МАЛЬЦОВСКОЙ 2021, 1. МІСТО: Людміла Шандалова

Выбране з Літературного конкурзу Марії Мальцовской, рік 2021, тексты Людмілы Шандаловой – 1. місто

Ці памяташ

Ці памяташ тамте лїто
румянцём мі тварь залляло.
што хотїло быти скрыто –
на поверьх ся выдряпало.

Ці памяташ сверщкы в траві?
концерт попсув тепле тихо
занїміты сердця праві
воёвали з людьсков пыхов.

Звізды слабо заклїпкали,
почінала нічка нова
в полю тугы ся волнили –
повторяли твої слова.

Любов

На листку, у росї,
в верьбовым багнятку,
премного мілости
людьского порядку

Хоць дражка змачана
під хмаров чорнявов
каждый крок од рана
небесным є даром

У співі пташенят,
на крылах сокола
чуєш як знесена
любов к нам глаголать?

В осїннїй кошарї

Молода яблінка
в осїннїй кошарї
на кермеш кліче нас
сад червінь малює
галузкам на твари
ябками дозрїв час

На небі до хмары
слызонькы звязаны
не єсть днесь зберачів
плоды суть давно там
з листками спаданы
докопы на пляці

Лем я ся намагам
дістати несміло
солодость з єдного
судьба мі не жычіть
в устах мі потерьпло
зо смаку планого

Post Views: 435