Вітязём Літературного конкурзу Марії Мальцовской 2021 є Людміла Шандалова

Мілы чітателї,
рiк 2021 є за нами а з ним і 8. Літературный конкурз Марії Мальцовской. Так як минулый рік быв в світовых удалостях міксом очекаваных удалостей і нечеканых прекваплїнь, в тім самім дусї ся презентовали і авторы запоєны до конкурзу.До 8. рочника Літературного конкурзу ся запоїло довєдна девять авторів, і хоць ся меджі нима не обявив жадный цалком новый автор, ішло о інтересну літературу сучасных русиньскых писателїв на Словеньску, з котрой не было легке выбрати тых найлїпшых. Авторы Людміла Шандалова, Владїслав Сивый, Елена Хомова-Грінёва, Юрко Харитун, Гелена Ґіцова-Міцовчінова, Мірослав Жолобаніч, Марія Шмайдова, Мілан Ґай а Штефан Смолей ся презентовали з прозов, поезіёв а доконця і єдным драматічным текстом.

Відеозазнам з Выгодночіня Літературного конкурзу Марії Мальцовской 2021

Меджі оцїненов троїцёв є Елена Хомова-Грінёва з Удола окр. Стара Любовня (укажка ту), котра ся за послїднї рокы участи в конкурзї натілько злїпшыла, же єй творчость была поротов оцїнена третїм містом.
Тексты далшых двох авторів были квалітатівнї вырівнаны а порота аж по довгій діскусії вырїшыла, же друге місто здобуде Владїслав Сивый з Пряшова (укажка ту) із своёв гуморістічнов сайнс-фікшн гров – Місія, в котрій ся дізнате, же близкый контакт Руснаків з козмічнов ракетов просто не може допасти добрї.
А на конець… то найлїпше! Перше місто патрить авторцї, котра за дакілько років заінтересовала одборників і шыроку верейность своїма зборниками поезії про дїти, історічно-споминковов прозов і драматічныма грами про школьскый театер. Авторцї, котра зо своёв поетічнов творчостёв здобыла в конкурзї перше місце уж другый раз. Є нёв Людміла Шандалова із Свідника (укажка ту). Ґратулуєме вітязям і дякуєме вшыткым участникам конкурзу за участь!

В наслїдуючіх днях будеме поступно публіковати укажкы творчости каждого участників конкурзу. До того часу ся але можете вернути к выгодночіню Літературного конкурзу, де суть укажкы чітаны нашов поротов.