Сухый, Штефан
Публікації:
- Гірська вишня (1982)
- Сонячна композиція (1987)
- Русиньскый співник (1994)
- Енді сідать на машыну вічности (1995)
- Азбукарня (2004)
- Аспірін (2006)
- Слон на Кычарї (2007)
- Незабудка (2008)
- Міст над рїков часу (2009)
- Азбукова мама (2010)
- Третє крыло (2014)
- Як Руснакы релаксують (1997, 2017)
Радіогры:
Добра вода, Склероза, Рулета, Хлїб душы отця Александра, Владыка або добрый ученик Хріста
Учебникы:
Літературна выхова про 5. класу ОШ, Літературна выхова про 6. класу ОШ, Русиньска література про 3. класу СШ а Русиньска література про 4. класу СШ).
Жывотопис
Штефан Сухый ся народив 24. мая 1946 в селї Нехваль Полянка Сниньского окресу. Основну школу выходив у своїм роднім селї, середню Общо-освітню школу в Гуменнім. По її успішнім закончіню штудовав на Філозофічній факултї Універзіты П. Й. Шафаріка в Пряшові, де промовав в одборї україньскый язык – словеньскый язык. По высокій школї зачав редакторовати в редакції народностно-етнічного высыланя пряшівского розгласу. Од 1973 р. учів україньскый і словеньскый язык на строярьскім учіліщу в Снинї. Од другой половины 90-тых років 20. ст. аж до року 2008 быв методіком русиньского языка на Методічно-педаґоґічнім центрї в Пряшові. Дїтём і русинству присвятив цїлый свій професіоналный жывот. Є автором даскількых русиньскых учебників: Літературна выхова про 5. класу ОШ, Літературна выхова про 6. класу ОШ, Русиньска література про 3. класу ОШ і Русиньска література про 4. класу СШ.
Свою писательску путь зачав уж як штудент высокой школы. Тогды свої творы писав по україньскы. В тім языку выдав і першы зборникы поезії „Гірська вишня“ і „Сонячна композиція“. Так через поезію ся вертать до свого родного краю і ку близкым людём в нїм, якых у своїм сердцю утримлює з ласков дотеперь. В р. 1994 му выходить перша по русиньскы написана книжка поезій під назвов – Русиньскый співник, яков ся уж тогды запрезентовав як єдна з найвыразнїшых особностей у літературї Русинів Словеньска в сучасности. Свої поезії і публіцістічны творы реґуларно друкує на сторінках ІнфоРусина, Народных новинок, в колектівных зборниках, календарях і інде. Він є автором і далшых русиньскых зборників поезій про старшых – Енді сїдять на машыну вічности і Аспірін, зборників стишків про дїти: Азбукарня, Слон на Кычарї або Незабудка. Выдав і зборник гуморно-сатірічных повідань під назвов Як Руснакы релаксують. Мімо того приготовив і пару драматізацій гер про радіо і театер, котры у слухателїв здобыли великый успіх. Як видно, поет, прозаїк, драматурґ і публіціста Штефан Сухый є барз плодным і якостным автором. В сучасности автор жыє у Стащінї (окрес Снина), де мімо літературной творчости ся венує садовництву і турістіцї.
Здрой: Бц. Сілвія Лисінова
Оцінїня
Премія А. Духновіча: 2000 – Як Руснакы релаксують (1997)
Літературный конкурз Марії Мальцовской:
- 2015 – 1. місто
- 2016 – 1. місто
- 2017 – 2. місто