АРХІВ: Цїна А. Духновіча за русиньску літературу за рік 2010 была удїлена Осифови Кудзеёви
Літературный вечор з несподїваным завершінём
Єднов з доповнюючіх акцій лїтнёй школы русиньского языка (Studium Carpato-Ruthenorum, єй першый рочник ся одбыв од 14. 6. 2010 до 4. 7. 2010) быв Літературный вечор, котрый ся одбыв 30. юна 2010 в салонику їдалнї высокошкольского інтернату Пряшівской універзіты.
Приємне посиджіня в коморній атмосферї мала під патронатом авторка проєкту Лїтнёй школы, літераторка з Інштітуту русиньского языка і културы Мґр. Алена Блыхова, котра была заєдно і модераторков цїлого вечора. Нашым краянам споза границь были представлены найвызначнїшы писателї русиньской літературы, переважно зо Словеньска, участь прияв і взацный гость з Польщі – писатель Петро Трохановскый-Мурянка. Русиньску літературу на Словеньску представили Марія Мальцовска, Штефан Сухый і Осиф Кудзей. Шкода, же позваня зо здравотных прічін не міг акцептовати і Миколай Ксеняк, бо тым бы было завершене квартето русиньскых писателїв зо Словеньска, котры были оцїнены престіжнов преміов А. Духновіча за русинську літературу.
Але тота інформація была притомным одгалена аж на кінцю вечора, котрый кулміновав якраз переданём премії А. Духновіча за рік 2010 панови Осифови Кудзеёви з Няґова. Премію „русиньского Оскара“, котру спонзорує Стефан Чепа з Торонта і удїлює Карпаторусиньскый научный центер в США передали проф. П. Р. Маґочій і проф. Патріція Крафчік. Также, як сконштатовала модераторка вечора: „… за столом уж сидять русиньскы писателї – вшыткы лауреаты премії А. Духновіча за русиньску літературу.“ Можеме лем доповнити, же прім у чіслї лауреатів ведуть словеньскы Русины, бо зо Словеньска то быв уж четвертый оцїненый, позад Марії Мальцовской, Штефана Сухого і Миколая Ксеняка. А же тото оцїнїня было передане досправды тым найлїпшым, то нам вшыткы лавреаты доказали презентаціов своїх творів, а нелем декламованём, бо дакотрых з них судьба обдарила і другыма цїнныма дарами. Петро Трохановскый-Мурянка з недалекой Крыницї на властну, але і поезію другых авторів компонує і музику, также было радость послухати ёго прекрасный голос. В тім одношіню ся не дав заганьбити ани свіжый лавреат пан Осиф Кудзей, котрый пришов з цїлым своїм „фан-клубом“ Няґівчан. Многы притомны ся на вечорї не убранили доятю і слызам, кідь тріо Осиф Кудзей, Серґей Сметанка (староста Няґова) і Ян Блашко (священик з Меджілаборець) заспівало пару фраґментів з Акафісту священомученикови Павлови Петрови Ґойдічови, котрого автором є праві Осиф Кудзей, звізда літературного вечора.
Пане Осифе Кудзею, вшыткы Вам тоту славу од щірого сердця жычіме. Вказали сьте нашым краянам, же мають быти на што горды. Представили сьте дїдовизну їх предків неопаковательным способом. Ваша харізма ся дотулила нас вшыткых – участників того незабытного вечора.
К. Копорова,
председкыня Сполку русиньскых писателїв Словеньска