ЛІТЕРАТУРНЫЙ КОНКУРЗ МАРІЇ МАЛЬЦОВСКОЙ 2021, 2. МІСТО: Владїслав Сивый

Выбране з Літературного конкурзу Марії Мальцовской, рік 2021, текст Владїслава Сивого – 2. місто

Відеозазнам з выгодночіня Літературного конкурзу Марії Мальцовской 2021 можете видїти ту.

Місія (укажка)

Не пийте тайнї сливовіцю в козмічных кораблёх, або холем не бухайте з ничім по овладачім пултї корабля…

(До козмічной лодї входять три персоны – єден технік а дві упрятовачкы.)

Найман: Казали мі колеґове, же вы дві сьте ту цалком новы, а я вас мам зашколити до вашой роботы… Так є?…

Надя і Аня: (На знак згоды прикывують головами…) Так є!

Найман: Моє мено є Бенъямін Найман а роблю ту техніка на козмічных лодях… Як видите, і вы дві будете брати участь на новім козмічнім проґрамі НАСА… Тото є лодь АНДРОМЕДА урчена про експедіцію на Марс… Іщі нїґда людьска нога не стояла на інщій планетї… Вшытко є ту праве, скуточне, приправлене на штарт… Ваша робота є проста… Мусите выдезінфіковати простор, в котрім буде бывати посадка… На Марс не смієме перенести ани єдну бактерію із Землї. Ту, в тій бандасцї є шпеціялный розток, там мате рянды, кефы… Умыти мусите вшытко… Але позор!!! Няй вас Господь Бог заварує дотыкати ся дачого на пултї заложного ряджіня лодї!!! Тото є табу!!!… Надалеко обходити!!!… Мам ту актівованы вшыткы сістемы ряджіня корабля. Мушу іщі понаставляти даякы пристрої у велительскім модулї… Пулт дам до порядку я особнї… Розуміли?!?…

Надя і Аня: Єс, коммандант!!! Розуміли!

Найман: Буду по цїлый час ту за тыма дверями – у велительскім модулї… (одходить)

Надя: Вірю, же нам од того маґляйзу в бандасцї не выпадають зубы або волося…

Аня:   Я зачула, же сьме уж четверта чата упрятовачок на тім кораблю…

Надя: (Понюхать отворену бандаску.) Фуууй… Та тото мусить быти рядне свинство.

Аня:   А іщі єм чула, же вшыткы перед нами скончіли в шпыталю… Заприйте то, скоро заприйте… Позерайте, я ту мам із собов в ташцї у фляшках воду… Кус помыєме з обычайнов водов, тай добрї буде…

Надя: Але то ся не сміє… Што як зніщіме цїлый Марс?!?

Аня: Але прошу вас. Тадь там є лем самый шутер… Каміня!!! Што ся там дасть пробога подля вас зніщіти? Каждый з астронавтів, што наступлять до корабля, у властнім брїсї понесе около двох кілоґрамів бактерій… А повный рот, уха, ніс, всягды… Што з тым зроблять?

Надя: Гм… Мате правду… Ніч…

Аня:   Но видите… Хочете, жебы вам выпадали зубы?

Надя: Нї…

Аня:   Берте фляшку з водов а мыйте…

Надя: Чудне, же сьме ся ту зышли в далекім світї дві Русначкы. А вы сьте одкыль, як сьте ся ту дістали?

Аня:   Я єм з Выравы, од Лабірце… Хлопчиско мій мі ту выбавив бріґаду…

Надя: А мі зясь выбавив роботу брат… Він ту ходить до Америкы як на клавір… Я із Хмелёвой, од Бардеёва…

Аня:   Слухайте, а не могли бы сьме собі потыкати?

Надя: Ясна вец… Я єм Надя.

Аня:   Аня… Ага, позерай, што мам ту у ташцї… Лїтровча сливовіцї… Домашня, мій Янко напалив… Тото мусиме запити, дївче… На наше зознамлїня і жебы лодь за драгов не згаваровала…

Аня:   Барз чудне… В тім року, як єм ся народила, вылетїв із Землї до весміру першый чоловік… Юрій Ґаґарін… Но хто бы повів, же на стары колїна буду пуцовати я козмічны кораблї на Флорідї… Тадь у нас уж давно комунізм мав быти… Ей, фест ся змінив світ за мого жывота, вера же змінив…

Надя: А што єсь робила перед тым, як єсь ся стала упрятовачков…

Аня:   Редакторку в радію… А ты?

Надя: Учітельку в Бардеёві а пак гайзелбабу в Лондінї…

Аня:   Якый світ малый… Дайме щі собі до носа…

Надя: Пре-пре-пребачте… Ком-ком-коммандант… Дезінфіковали сьме сі жалудкы… Аняяяяяяяя!!! Нїїїї!!! Не кладь фляшку на пуууууулт!!!!

(Чути штарт моторів ракеты… Одразу вшыко в лодї зачне гукати, сычати… Козмічному кораблю ся запнуть моторы і штартує до весміру… Вшыткы коло того крічать, як кебы з розума зышли… Як заникне гукот моторів, настане довга павза…)

Найман: Так, а сьме в ріці… Летиме на Марс, або Господь Бог знать де… Курва, курва… Є шабес, во весмірнім центрї в Гюстонї никого… Я ся забю…

Аня: Ёй, Ёй, Ёй… А керує дахто з тым кораблём?

Найман: Господь Бог ай палубны почітачі…

Надя: Но, кедь є в них Віндовс 10, та збогом…

Аня: А розумить ту дахто тому?!?

Найман: Кус я!!!… Вы босорко стара!!!… (дістане гістерічный захват…) Вы налпо!!! Мусили сьте бухнути з тов фляшков по овладачім пултї?!? Казав єм яснї, нічого ся недотыкати!!!!!!!!!

Гало, Гюстон, чуєте ня?!?… Маме проблем… Гюстон, Гюстон, чуєте ня??? Проблем, маме проблем!!!… (пустить тлачідло…)

Та де, казав єм, же там не є никого… Всягды анархія…

Мушу іти до велительского модулу… Сконтролёвати коордінаты в главнім почітачу… (одходить)

Проблемы ростуть

Надя: –      розплаче ся

   Што теперь з нами буде, што теперь з наме буде?…  Я не знам лїтати на дружіцях… В бутіку єм собі дала одложыти красны шматы за десять доларів… На другый тыждень мать брат народенины… На столї в кухни єм охабила розмерзати куря… На поливку. І  мясо на недїлю…

Аня: Оле, спокой ся… Тадь Найман знать з тым кус керовати… Може щі ся вшытко добрї скончіть… Мовле, маме фляшча палїнкы, ціґаретлї в кабелцї… Недаш сі?… Конечнї даяка зміна у тім мізернім жывотї… Кус ся повозиме а вернеме ся домів…

Надя:  Смутно мі є… Я не хотїла штартовати до весміру…

Аня:  Позерай, в пятьдесятых роках ся на дружіцях возили псы ай налпы а вернули ся домів… А не мусили знати ніч о ракетах… Главне є мати холодну голову…

(одразу ся з ампліону озве хлопскый голос…)

 

Ферій: Галооо… Ту вратніця… Міс Канаверал, Флоріда…

Слухай Найман, яку Марію єсь поробив з тов ракетов?!?… Ниґде никого, лем каблы од ракеты зістали одорваты на земли… Де тя до пекла понесло?

Аня: Але мы сьме кликали Гюстон, Тексас…  Не Флоріду…  То є даякый омыл пане…

Ферій: Ріц палёва ня по тім де сьте вы кликали!… Мене інтересує де змізла ракета з одпалёвачой рампы через мою службу?!?… Што повім в понедїлёк шефім, як прийдуть рано до роботы… А вы сьте што за піпку?!?… Найманова фраїрка?

Надя:  Ой нї, нї, мы сьме тоты дві новы упрятовачкы…

Ферій: Аааа, базмек!!!… Также вы сьте там аж тройка?!?… Такой мі заклічте Наймана, бо буду стрїляти…

  • Найман акурат прибігне к упрятовачкам.

Найман:  Ту Найман… То ты Ферій???…

Ферій: Я, я… Якый іншый дебіл бы щі ту в соботу по обідї міг сидїти в роботї окрем мене… Де ракета?…

Найман: Но, та на тото є, братку, тяжке преснї одповісти… Першы два ступнї носной ракеты ся оддїлили над Атлантіком, звышок летить на Марс…

Ферій: А базмек… Та тото наш шеф нерозходить так скоро… Далшый штарт быв планованый аж о десять років… Слухай Найман… Прышла ту за мнов моя стара…

Найман:  Но а?!?… Што я мам з твоёв старов?

Ферій: Хоче кобасу…  В хладнічцї в велительскім модулї єм мав схованых пять кіла кобасы… Жебы мі єй ту тоты пажерны 200 – кіловы америцькы колеґове на вратници не пожерли… Не оповаж ся єй дотулити… Як ся вернете на землю а буде з нёй хыбовати лем центіметер, забю тя…

Найман: А інакше як ся мате там долов?

Ферій: Вшытко ОК, лем  Хосе і Хуан Марія, тоты двоми новы Мексічане, кус офаркли на одпалёвачій рампі… Авкурат малёвали новый напис на ракету… Але уж їх пожарници дають долов з рампы..

Найман: Так агой…

Ферій: Агой…

А іщі нам десь змізнув тот другый Хуан… Хуан – Педро…  Санчез!… Забога сьме го не годни ниґде найти… Не знаш ніч о нїм?…

Найман: Што єсь… Што я мам із Хуанами… Дай мі покій, мам гіршы проблемы… Агой!…

Надя: Але сьте ся потримали як правый ґавалїр, пане Наймане… Не прозрадили сьте, же то мы дві з фляшков сливовіцї одпалили ракету…

Найман: Вы мате сливовіцю? Та тото уж єм давно не пив… Послїднїй раз, як ня мій дїдо з нёв гартовав…

Аня: А одкыль быв ваш дїдо?

Найман: З Гуменного… Не збачіли сьте, же з ваме по руснацькы бісїдую?  А Ферій, вратник, є з Кобасова…

Аня: З Гуменного?!?… А у нас у Выраві быв тыж єден Найман – новтаріш… По войнї ся дав переменовати на Новака…

Найман: То дїдів брат…

Надя: Хіхіхі… Самы Руснаци…

Найман: Но, не так цалком… Ту панї Аня уж істо знать, же я  єм жыдівской віры…

Аня: Хіхі, то ніч, главнї, же знате по руснацькы… Знате тота анґлічтїна, то є страшна бісїда…

Надя: То у нас ани конї так не бісїдують… Якесь чудне гугняня, мумланя, як бы  з горячов бандурков у ротї… Но і позерай ту… Главна бісїда світа…

Аня: Но представте собі і таке чудо присїло цїлый світ… Та уж не міг світ радше по таліаньскы або по шпаньєльскы бісїдовати?…  Не хочете собі потыкати?!?… Теперь уж є то єдно, не сьте шефом у роботї… Вшыткы сьме на тім єднак…

Найман: Но добрї, але наллїйте той сливовіцї… Я єм Беній…

Аня: Аня…

Надя: Надя…

Аня: Ты, слухай, хлопе, а будеш ты знати даяк з тым чудом  пристати?

Найман: З тым пристане ай цвічена налпа… Вшытко рядять почітачі, на лодї є громада сензорів… Хыбаль, жебы ся дашто зопсуло… То уж бы быв проблем…

Аня: Но видиш Надё, я ті казала же вшытко добрї скончіть.

Надя: Но та полетиме уж назад, домів?… Мі ся в кухне на столї курка розмерзать…

Найман: – мыкне з плечами… Так ня поджубають як гада, як ся вернеме… Порушив єм найменше 100 предписів…  Найскоре скончу в басї а до смерти буду сплачати паливо і тоты два ступнї ракеты, што упали до Атлантіку…

Аня: А закурити можеме?

Найман: В жаднім припадї!!!…  Такы дїла можны лем на руськых лодях/кораблях…

Надя: Посрата Америка…  Але выпити можеме?…

Найман: Тото гей…

Аня: Но, в прусерї сьме так ці так… Та ся холем поряднї повозьме…

 

Pridaj komentár

Vaša e-mailová adresa nebude zverejnená. Vyžadované polia sú označené *