Вышла цїнна книжка творів Анатолія Кралицького

Кінцём рока 2019 вышла цїнна книжка творів Анатолія Кральцкого з назвов Творы (Выдавательство Пряшівской універзіты, 2019).

Кралицького тексты были за ёго жывота публікованы на сторінках різных журналів ці антолоґій, своє дїло але через свій жывот не позбірав. Кінцём 20. столітя ся науковцём подарило выдати лем часть з Кралицького прозаічных текстів в окремых выданях.

Цїлём выданой публікації є популарізація творчости о. А. Кралицького як єдного з найталентованїшых представітелїв будительского напряму в карпаторусиньской літературі 20. сторіча. Публікація ся складать з выбраных текстів писателя, котры были написаны через трідсять років авторовго творівого періоду. Тоты тексты представлюють чітателёви А. Кралицького як чоловіка многых талентів, писателя шырокого діяпазону тему, в тім часі популарного літерата і публіцісту, етноґрафа і приспівателя до першых русиньскых новинок зачатку 60. років 19. сторіча ці автора статей о історії ґрекокатолицькых монастырів.

В публікації ся находить вступна часть єдного з едіторів, Мґр. Валерія Падяка, к.н., котра пише о жывотї і творчостиц о. А. Кралицького, главнї о дотеперь незнамых або неясных містах в ёго біоґрафії і бібліоґрафії.

Публикація ся складать з частей: 1. Вступна часть Мґр. В. Падяка, к.н., 2. Дїло А. Кралицького: части Прозаічны творы 1860-х років, Прозаічны творы 1890-х років, Переклады и адаптація, Мемоары, Історія и палеоґрафія, Публіцістіка, Выбрана корешпонденція; 3. Ілустрації і Додаткы.

Тота публікація є інтересна про одборну верейность, котра ся інтересує о русиньску літературу, културу і історію, таксамо як і штудійный матеріал про літератів і штудентів русиньского языка і културы.

 

Книжка вышла з підпоров Фонду на підпору културы народностных меншын.

 

Книга: Анатолій Кральцькый. Творы

Едіторы: Валерій Падяк, Міхал Павліч

Рік выданя: 2019

ISBN 978-80-555-2344-6

Почет сторінок: 440