Елена Хомова: Віршы

Гускы

Вышла гуска з гусятами
за світлого рана,
купати ся до водічкы,
перша іде мама.

За нёв малы гусятенька,
до воды втїкають,
свої ножкы і крылочка
во водї мачають.

Ґа-ґа, -мати ґаґать,
лем ся не потопте,
омыйте ся, окупайте,
шорик за мнов зробте!

Выйдеме там на бережок,
водічку стреплеме,
брыдке піря выторгаме,
там ся попасеме.

Зайчік

Скаче зайчік през ярочкы,
поза плоты, през горбочкы,
в полю ушка наставлює,

што ся дїє, наслухує –
де полёвник, скады зрада,
втїкать скорше, кады владать.

Пулька

Пуль-пуль-пуль!
На дворї ся пулька
роспірила,
до биткы ся з курочками
гнедь пустила.
Ту не ходьте, ту є моє!
Не дзёбайте ани єдно,
ани двоє!
Пуль-пуль-пуль!
Зерно, што ґаздыня дала,
то не про вас,
лем про мене насыпала.

Когут

Рано когут першый будить,
псика Рекса в старій будї.
Встаньте вшыткы, уж ся збудьте,
до роботы ся рихтуйте!

Як заспите, чія вина?
Кі-кі-рі-кі, день зачінать.
Куркы з банта позлїтайте,
за мнов на двір машіруйте!

Pridaj komentár

Vaša e-mailová adresa nebude zverejnená. Vyžadované polia sú označené *