Міро Жолобаніч: Хто ся сміє, є одважный

Зачінати є все тяжке
зато ся много людей до нічого
ани не пущать.

***
Школа жывота є тяжка і трудна,
зато в нїй пропадує
найвеце людей.

***
Розмаховати руками дошырока
іщі не значіть, же маєме
на вшытко досяг.

***
Робити головов іщі не значіть,
же мусиме на вшытко
прикывовати.

***
Рада про мужів:
Давайте собі позор, кідь бігаяте за
женами, жебы вас не добігли.

***
Рада про жены:
Много позорности од мужів
може отупити вашу порозность.

***
Все мі бісїдовали, жебы єм ся
справовав подля властной головы,
але порозумів єм тому аж тогды,
кідь єм дістав розум.

***
Чую ся барз укривдженый.
Мозґовы бункы мі одумерають,
а туковы нї.

***
Кідь вам нихто ніч не дарує,
то іщі не значіть, же мусиме
зачати красти.

***
Спав єм, а снило ся мі, же жывот
є красный. Збудив єм ся, а зістив єм,
же єм сі міг іщі поспати.

***
Быв песіміста.
Терезвый оптімізм го хватав
аж по другім лїтрї вина.

***
Піну до купаня не хосную.
Стачіть мі, же моя жена пінить
каждый день.

***
Є інтересне, же водници жыють
під водов, а подводници
над водов.

***
Не знаю собі представити тото
нещастя, кідь ся камінь мудерцїв
дістане до рук дуракови.

***
Чоловік ся вычленює із звірячой рішы
може зато, жебы міг робити
великы звірьства.

***
Одписав ся із екзамена тым,
же го прихопили при
одписованю.

***
Пересвідчіти чоловіка
із мягкым мозґом
є твердый орїшок.

***
Мовчу не зато,
же ніч не знаю,
але зато, же знаю своє.

***
Наша жывотна уровень ся двигла так
высоко, же много людей на ню ани не
може досягнути.

***
Ці бісїдуєме, ці сьме тихо,
і так за вас говорять
вашы хыбы.

***
Тот, хто краде,
тому суть законы
украджены.

(Мірослав Жолобаніч: Хто ся сміє, є одважный, Пряшів: Сполок русиньскых писателїв Словеньска, 2017.)