Даньєла Капралёва: Серна в нераю

Чуєш?
чуєш лїтню пахоту пороху по дождю
так якось пахнув чоловiк по потопi
ангелы спасы над землёв лїтали

да любите друг друга
спiвали

      Вышенець, 2004

—
староба брыдь дїтино моя
чую голос материн
помалы заперaючій павучайкы жывота
тогды глядам білы скалы
спомалять товкот мого сердця
вершины Настасу
найдуть слободу
травы лук
уплетуть вінець Небес
котрый сінявов зашепче…
ці вхабить світ лїпшый як найшла
     Стриговске сїдло, 2008
—
сьме влада зла
смiтя свiта
винника не є

ходиме
по спуканiй земли
слухаєме
чорных Ангелiв
падаєме
вылїзаєме
тяжко
як скаля iз моря
     Гуменне, 2010

—
замлїта земля
антiсвiтом владїє лукавый людиск
пошкрябкує,
правду кривитъ,
душу краде

звiрята за нас ганблять ся
моя мачка пряде

зошмарь крыла, Боже,
вкаж пiшник до неба

богатство од слова Бог
     суд, 2013
—
сидиме з ангелом тихо задуманы
не є прiчiны на жаль
не є прiчiны на смiх
чекайме на сон малой снїженкы
шi без грїха

то не земля, што носить нелюдей
     Вельховець, 2003
—
звiзды земл
плювають
на небо
холодне
попiль свiта
розносить
божый вiтор
дым дiявола
давить доброту
людей
ланарить далеке
вымерать близке
дома
     в нас хмарно, 2007

—
глина
то тїло землї
мати людей
мы
болото Юды

хоче ся нашыроко розкрыти
рукы
стати хрестом
простым
бiлым полотном
     півнiч, 2007
—
кiдь натреш воргы
малёватком
нїґда неспознаш
пекоту
спрасканого рота
од морозу
од сонця
од соленых клїпайок жывота
     Терновець, 2008
—
як Бог створив
купала ся рано в ружовых снїгах

кормлена вiтром
вбертала голову за сонцём

вымолена скалём
чiстила душу ясным небом

вечур спочiнула на плечу свого Ангела
     Кривань, 2003

—
самоту жывота з небом пережывам
знакову бісїду лїса слухам
попалом тїло вболїкам
зо сернами нарїкам

ту воду не палять
плечі не крывлять
вытокы вартують
     Стриговске сїдлo, 2008
—
сїджу
в долонях місяць плавать
вода глядило
в нїм листя одходить
гі лады з небіжчіками

по березї блудять
мертвы душы

мало залюбленых
лем я i Лаборець
     септембер, 2008
—
олигархiа
смердяча харкля землї

што за бiдна бiда
владїти мертвым душам?

сiйме хоць в слызах
оджиньме страх
жати будеме в правдї

выйде з кулка на кулок!
     недїля, 2013

(Капралёва, Данієла: Серна в нераю. Пряшів: ОЗ Колисочка – Kolíska, ІСБН 978-80-972115-6-1, 73 с.)