АРХІВ: Споминаня на Михала Павука (20. 9. 1925 – 23. 11. 2012)
Одышов до вічности член СРПС
23. новембра минув рік од часу, коли у віцї 87 років навсе опустив позермскый світ середнёшкольскый професор Михал Павук з Братїславы. До послїднїх днїв свого жывота творив (окрім іншого быв актівным членом Сполку русиньскых писателїв на Словакії і часто приспівав своёв поетічнов творчостёв до русиноязычных періодічных і неперіодічных выдань). Поетічна творчость Михала Павука є цїнна тым, же ся операть о історічны факты у розвитку Русинів. Має народнобудительскый характер, автор Русинів видить в контекстї розвитку другых славяньскых, але ай неславяньскых народів, причім нову надїй про Русинів видить у їх зновувозроджіню по роцї 1989. Нажаль, не подарило ся выдати ёго властну поетічну збірку. Хто сьте знали Михала Павука, спомяньте сі на нёго при чітаню слїдуючіх рядків з ёго біоґрафії.
Михал Павук ся народив в родинї железнічаря в Королеві над Тісов на Підкарпатьскій Руси. Молоды рокы М. Павука припали на бурливый період окупації ЧСР і Підкарпатьской Руси фашістами. Войнова окупачна сітуація (1939-1939), безуздный терор выкликовали протесты і в демократзічных групах Русинів. За актівну участь в протестных акціях, выготовлёваня і росшырёваня на Підкарпатьскій Руси плаґатів з протиокупачным і антіфашістічным обсягом М. Павук быв арештованый і наслїдком рїшіня суду вышмареный з ґімназії в Хустї із заказом штудовати на вшыткых школах в Мадярьску. Ґімназію так М. Павук закінчів аж по ослободжіню в роцї 1945 в Ужгородї.
Михал Павук быв абсолвентом оддїлїня руського языка і літературы Філолоґічной факулты Ужгородьской штатной універзіты. В роках 1952-1966 учів руськый язык і літературу в ужгородьскых середнїх школах, в роках 1966-1969 в середнїх школах в Кошіцях, а од року 1969 быв ведучім Кабінету руського языка і літературы Крайского педаґоґічного інштітуту в Братїславі, одкы в роцї 1989 одышов на пензію.
Кветослава Копорова
председкыня Сполку русиньскых писателїв Словеньска,
Пряшів.